Make your own free website on Tripod.com

N’IMIRUMBIRE YABA IYA NTENYO[1]





Uyu mugani umuntu awuca iyo agobotswe n'amaburaburizo abandi bahinyura,
agashobora kugoragoza icyari kimubogamiye; ni bwo agira ati: «N'imirumbire
yaba iya Ntenyo !» Wakomotse ku bashonji bo mu Buganza (Kibungo); ahagana mu mwaka w'i 1800.





Mu rwimo rwa Yuhi Gahindiro, mu Rwanda hateye inzara kirimbura; bayita
Rukungugu. Amapfa aracana, ibintu biradogera impande zose z'u Rwanda: amapfa
aracana mu Buganza, aracana mu Mutara, aracana mu Rukiga rwa Byumba,
arasesura mu Rukaryi n'u Bwanacyambwe; mbese utwo turere turarimbuka.



Ibintu bimaze kuyoberana, abagabo babiri bo mu Buganza bacitse ku icumu,
bumva bavuga ko i Bumbogo bwa Mbirima na Matovu hagikanyakanya. Barikora
n'abana n'abagore babo baboneza basuhukiyeyo; bagezeyo basanga Abambogo na
bo bahonda inguri. Babikubise amaso barumirwa; baribaza, bati «Tubikitse
dute ko tutabona icumbi kandi ntidufunguze! tubaye abande !?»



Bigeze aho baragenda biroha mu rugo rw'umukecuru w'umupfakazi wari aho mu
Bumbogo. Bagezeyo bamwaka icumbi. Umukecuru arababwira, ati «Nimurare, ariko
nta funguro mubona; dore na twe turicira isazi mu maso».

Baracumbika, ariko barara bagera ijoro. Babaza wa mukecuru, bati «Mbese
ntiwatumenyera u Rwanda rwaruta urundi ?» Umukecuru, ati «Numvise ko hakurya
aha ku Ndiza hapfuye gukanyakanya, ariko jyewe ho nabuze intege zangezayo».
Abagabo barita mu gutwi.



Bukeye baradogagira bambuka Nyabarongo bafata ku Ndiza. Bagezeyo basanga
hari hanyuma y’ibibi byose. Ni bwo bigiriye inama, bati «Aho gupfa uru
nimuze dusindagire dusubire inyuma twirohe muri Nyabarongo!» Abagore babo
babyumvise, barababwira, bati: «Nimugende mwenyine ntitwatinyuka kwirohera
abana mu ruzi». Mu gihe bakibivuga, bumva abandi badagari bavuga, bati
«Tugiye ku Ntenyo ngo bejeje uburo !» Babandi, bati «Na twe nimuze tujyeyo,
tuhace inshuro none twazarokoka !»



Nuko bikoma abo badari bandi, baradogagirana bataha mu Marangara, bukeye
barasindagira bagera ku Ntenyo; batungukira ku murima w'uburo w’umugabo
Mirenge ya Kigogo, uyu wari ukize cyane mujya mwumva, ku buryo na n’ubu
umuntu ukize bigaragara bavuga, ngo «Akize ibya Mirenge». Bakibukubita
amaso, ntibirirwa babaza, biroha mu murima n'abagore n'abana.

Ubwo bawugezemo abarinzi babwo bagannye imuhira, ariko kandi n'ubwo buro
bukaba bwararumbye bweze ibitarutaru. Bamaze kubugeramo, baratangira
barahekenya. Igihe binikije bashishibuza, abarinzi babatungukiraho
barabafata. Bagiye kubakubita, baratinya, bati «Na hatoya batatugwaho,
ahubwo nimuze tubashyire Mirenge abitegekere !» Barabashorera no kwa
Mirenge, babagezayo ibyanga byabarenze. Mirenge abakubise amaso abaza
abarinzi, ati «Aba bantu ibyanga byarenze none ntibamariyeho twa
turumbaguzwa tw'uburo !» Abandi, bati «Ese wowe amaso ntaguha?»



Ba badagari bumvise Mirenge yise bwa buro uturumbaguzwa, batera hejuru, bati
«N'imirumbire yaba iya Ntenyo !» Ubwo bashakaga kumwumvisha ko nta handi mu
Rwanda wabona uburo nk'ubwo bwo ku Ntenyo.



Abantu bari aho babyumvise babagirira impuhwe, na Mirenge arazibagirira,
ndetse abashyira iwe bacayo inshuro barakira. Nguko rero uko Mirenge
yakijije abashonji, inzara ica ibintu mu gihugu. Nubwo ubukire bwe icyo gihe
bwari buke bwose, yari abusumbije abandi bose muri icyo gihugu, kuko iwe
ariho honyine hari heze uburo. Ngubwo rero ubukire bwa Mirenge ku Ntenyo
mujya mwumva!



Nuko umugani utangira ubwo, umuntu yaba amaze gushoberwa akagobokwa n'akantu
k'amaburaburizo abandi bahinyura, agashobora gukika icyari kimwugarije,
noneho we akagira ati: «Nimurekere iyo, n'imirumbire yaba iya Ntenyo kwa
Mirenge !»





Imirumbire ya Ntenyo = amaburaburizo.



[1] ----- Original Message -----

From: Felicien Barabwiriza <mailto:mureke@yahoo.fr>

To: akagera@yahoogroups.com ; DHR
<mailto:Democracy_Human_Rights@yahoogroupes.fr> ; rwanda-l@yahoogroups.com
; rwandanet <mailto:rwandanet@ahoogroups.com> ; rwandanet@msstate.edu

Cc: Jean Joseph <mailto:jjnkumbo@hotmail.com> Mbonye ; napasamu@hotmail.com


Sent: Sunday, December 28, 2003 2:26 PM

Subject: [DHR] Insigamigani 73/N'imirumbire yaba iya Ntenyo



Muri uyu mugani murasangamo inkomoko y'ubukire bwa
Mirenge mujya mumva ngo bwari burenze urugero!!

Felicien M. BARABWIRIZA